සංක්‍රාන්ති වීම ව්‍යසනයක්ද?
දරුවකු ස්ත්‍රියක හෝ පුරුෂයකු ලෙස හඳුනාගන්නේ ලිංගික අවයව පදනම් කරගෙනය. නමුත්, අවයව අනුව ස්ත්‍රියක ලෙස සමාජය හඳුනාගත් පුද්ගලයාට පුරුෂ සමාජ භාවයක් තිබිය හැකි අතර පුරුෂයෙකුට ස්ත්‍රී සමාජභාවයක් තිබිය හැකිය. සරලව සඳහන් කරන්නේ නම් සිය ශරීරය ස්ත්‍රී හෝ පුරුෂ ලක්ෂණ ගත්ත ද තමාගේ ආත්මය තුළින් ඉල්ලා සිටින්නේ ද ලැබී ඇති ශරීරයට ගැලපෙන ලිංගික අනන්‍යතාවක් ද යන්න හඳුනාගැනීමේ ගැටලුවට මුහුණ දුන් අය ප්‍රධාන වශයෙන් මම සංක්‍රාන්ති ලිංගික ප්‍රජාව නියෝජනය කරයි. සිය අනන්‍යතාව සමාජය විසින් නොව තමා විසින් තහවුරු කරගත්විට පිරිමි ශරීරයක් ලද අයෙකු ස්ත්‍රී ලක්ෂණ සහ ඇවතුම් පැවතුම් සහිතවත් ස්ත්‍රී සිරුරක් ලද අයෙකු පුරුෂ ලකිෂණ සහ ඇවතුම් සහිතව ජීවත් වීමට උත්සාහ කිරීමත් දක්නට ලැබෙන්නේ බොහෝවිට එවැනි තත්ත්වයකදීය. එවැනි අය හඳුනාගත හැකිවන්නේ ඔවුනොවුන් සතුවන සමාජ චර්යාවන්ට අනුවය. මෙවැනි පුද්ගලයෝ සංක්‍රාන්ති සමාජභාවයක් ඇති අය ලෙස හඳුන්වති. වර්තමානයවන විට වෛද්‍ය විද්‍යාව දියුණු තත්ත්වයකට පත්වී ඇති හෙයින් ගැහැනියක පිරිමියෙකු කිරීමටත් පිරිමියෙකු ගැහැනියක කිරීමටත් හැකියාව ලැබී ඇත.
හෝමෝන ප්‍රතිකාර හා ශල්‍යකර්ම මගින් එවැනි පරිවර්තනයන්ට ලක්වූ පුද්ගලයෝ බොහෝය.
උදාහරණ ලෙස වෙනුසියුලාවේ දේශපාලන ක්‍රියාකාරිනියක වන තමාරා ඒඩිරියන්, ජපානයේ දේශපාලන ක්‍රියාකාරිනියක වන ආයා කමිකාවා, ඉන්දියාවේ පොලිස් නිලධාරිනියක වන ප්‍රීතිකා යශිනි වැන්නන් පෙන්වා දිය හැකිය.
වඩා වැදගත් කරුණ වන්නේ මෙම පිරිසත් සමාජයේම ජීවත්වන එක් කොටසක් බැවින් ඔවුනගේ මානව අයිතීන් ආරක්ෂා කිරීම රාජ්‍ය වගකීම වන අතර තනි පුද්ගලයින් සහ සමාජයකි ලෙස අප සියලු දෙනාගේ මනුෂ්‍යත්වයට ගරුකොට එකිනෙකාගේ ලිංගික අනන්‍යතා හෑල්ලුවට හෝ නොසලකා හැරීමට කටයුතු නොකළ යුතු බව ය.
ලංකාවේද එවැනි පිරිස් ජීවත්වන අතර ලාංකීය ප්‍රජාව ඔවුන් අමුතු ජනකොටසක් ලෙස පිළිකුල් කරයි. එම නිසා ඒ පිරිසට සමාජමය වශයෙන් බොහෝ ගැටලුවලට මුහුණ දීමට සිදුවේ.
සංක්‍රාන්ති ලිංගිකත්වය අභියෝගයක් ද?
සංක්‍රාන්ති ලිංගික ප්‍රජාව සංකීර්ණ අභියෝග රැසකට මුහුණ දෙමින් සිටිති. ඒ අතර නොසලකා හැරීම, කොන්කිරීම, සමාජ අපකීර්තියට පත්වීම සහ විරැකියාව දක්වා විශාල පරාසයකට මෙම ගැටලු විහිදී ඇත. එම හේතු නිසා ම මෙම සංක්‍රාන්ති ලිංගික ප්‍රජාව මානසික අවපීඩනය, කාංසාව,විශාදය සහ සියදිවි නසාගැනීම් දක්වා මානසික ගැටලුකාරී තත්ත්වයන්ට ද මුහුණදෙමින් සිටිති. විශේෂයෙන් ම සිය ආර්ථික තත්ත්වය නගාසිටුවීමට බොහෝවිට ස්වාධීනව කටයුතු කරන සංක්‍රාන්තික ලිංගිකයින්ට රැකියා නොදීම, ලිංගිකත්වය රැකියාව සඳහා තෝරාගැනීමේදී බාධකයක් යැයි අත්දකින්නට වීම, රැකියා ස්ථානවලදී අනවශ්‍ය විහිළු සහ වාචික හිරිහැර, කොන්කිරීමිවලට භාජනය කිරීම මෙන් ම ශාරීරක අපයෝජන කිරීම්වලට ද මුහුණදීමට සිදුවීම නිරන්තරයෙන් වාර්තා වන තත්ත්වයන් බවට පත්ව ඇත. රැකියා ස්ථානවලදී පමණකි නොව පොදු වැසිකිලි, පොදු ප්‍රවාහන සේවා, අලෙවි සැල් ආදී තැන්වලදී ද මෙවැනි දුෂ්කර අවස්ථාවන්වලට ඔවුන් මුහුණදෙමින් සිටිති.
සංක්‍රාන්ති ලිංගිකයන් සිය අනන්‍යතාව ස්ථාවර කරගැනීම සඳහා යොමුවන ශෛල්‍යකර්ම, හෝමෝන ප්‍රතිකාර ආදියේදී විශේෂිත වෛද්‍ය අවශ්‍යතා සඳහා රක්‍ෂණ ප්‍රතිපත්ති නොමැතිකම ද ඔවුන්ට සෘජු බලපෑමක් එල්ල කරයි.
මේක මානසික ලෙඩක් ද?
කොහෙත් ම නැත.
පුද්ගලයෙකුගේ ශරීරයේ සහ ස්ත්‍රී පුරුෂ භාවය අතර නොගැලපීම මානසික රෝගයක් නොවන බව ඇමරිකානු මනෝ වෛද්‍ය සංගමය 1973 වසරේ දී ප්‍රකාශ කර තිබේ. තවද 1990 දී ලෝක සෞඛ්‍ය සංවිධානය විසින් මෙය මානසික රෝගයක් නොවන බව පිළිගෙන ඇත.
නමුත්, ජාතික හා ජාත්‍යන්තර මට්ටමින් තවමත් මෙම සංක්‍රාන්ති ලිංගික ප්‍රජාව ගැටලුකාරී තත්ත්වයට මුහුණ දෙන අවස්ථාවන් අතිවිශාල ය. උදාහරණ වශයෙන් ඇමෙරිකානු හිටපු ජනාධිපති ඩොනල්ඩ් ට්‍රම්ප් විසින් සංක්‍රාන්ති ලිංගිකයන්ට ඇමරිකානු හමුදාවට බැඳීම තහනම් කිරීම, ශ්‍රී ලංකාවේ මධ්‍යම පළාත් ආණ්ඩුකාරවරිය ලෙස නිලූකා ඒකනායක මහත්මිය පත් කිරීම සඳහා අස්ගිරි පාර්ශ්වයේ හිමිවරුන්ගේ විරෝධය එල්ල වීම‚ මාතර රෝහලේදි පිරිමි පුද්ගලයෙකුට දරුවෙකු ලැබීමත් සමග මාධ්‍ය මගින් ඔහු සංක්‍රාන්තික පුද්ගලයකු ලෙස හඟවා දැඩි අපහසුතාවයට පත් කිරීම වැනි අවස්ථාය
සංක්‍රාන්ති ලිංගිකයින්ට සමාජයෙන් බලපෑම ඔවුන් ගේ මානසික සෞඛ්‍යයට තර්ජනයක් ද?
පුද්ගලයෙකුගේ ස්ත්‍රී පුරුෂ අනන්‍යතාවයට නොගැලපෙන ශරීරයක ජීවත් වීම නිසා ඇති වන මානසික වේදනාවක් වන Gender dysphoria, දුර්වල මානසික සෞඛ්‍යයකින් පෙළෙන සංක්‍රාන්ති ලිංගික පුද්ගලයින්ට ද හේතු වී ඇති අතර, සාමාන්‍යයට වඩා වැඩි මානසික අවපීඩනය, කාංසාව ආබාධ සහ සියදිවි නසාගැනීම් ඇති වේ.
2015 වසරේදී 20000 ට ආසන්න පිරිසක් යොදාගෙන කරන ලද විදේශීය අධ්‍යයනයකට අදාළ අන්තර්ජාල සමීක්ෂණයකින් හෙළි වී ඇති ආකාරයට සාමාන්‍ය ජනගහනයෙන් සියයට පහකට සාපේක්ෂව සංක්‍රාන්ති ලිංගික ජනගහනයෙන් සියයට 40ක් සියදිවි නසා ගැනීමට තැත් කර ඇති බවයි. සංක්‍රාන්ති ලිංගිකයන්ගෙන් සියයට 82 ක් සිය ජීවිතයේ යම් අවස්ථාවක සියදිවි නසාගැනීම් ගැන බැරෑරුම් ලෙස සලකා ඇති බව සාමාන්‍ය ජනතාව අතර සියයට 15 ට සාපේක්ෂව මෙම සමීක්ෂණයෙන් හෙළි වී තිබේ. කැනඩාවේ ඔන්ටාරියෝ හි සංක්‍රාන්ති ලිංගිකයන්ගෙන් සියයට 43ක් සිය දිවි නසා ගැනීමට තැත් කර ඇති අතර සාමාන්‍ය කැනේඩියානු ජනගහණයෙන් සියයට 4ක් පමණ වන බව පූර්ව පර්යේෂණ මගින් පෙන්වා දී ඇත. මීට අමතරව, සංක්‍රාන්ති ලිංගිකයන්ට එරෙහිව සිදු කරන මිනීමැරුම් සීඝ්‍රයෙන් ඉහළ ගොස් ඇති බව සංඛ්‍යාලේඛන පෙන්වා දුන්නේය. උදාහරණයක් ලෙස, සංක්‍රාන්ති ලිංගික සහ ස්ත්‍රී පුරුෂ සමාජභාවයට අනුකූල නොවන ප්‍රජාවන් අතර අවම වශයෙන් ප්‍රචණ්ඩ මරණ 27ක් 2019 දී එක්සත් ජනපදයේ වාර්තා වී ඇත. 2020 මැද භාගය වන විට, මානව හිමිකම් ව්‍යාපාරය විසින් මිනීමැරුම් 26 ක් දැනටමත් නිරීක්ෂණය කර ඇත.
සංක්‍රාන්ති ලිංගික ප්‍රජාව මුහුණ දෙන මෙම ගැටලුකාරී තත්ත්ව පිළිබඳ සාමාන්‍ය ජනතාව තුළ ඇති දැනුවත්භාවය අඩුවීම, සමාජ ඒකාබද්ධතාවයට බාධාවක් ඇති කරමින් පාලකයාගේ සිට පැවත එන බෙදීමේ සංකල්ප බොහෝදුරට බලපා ඇත. සංක්‍රාන්ති ලිංගික පුද්ගලයන් සක්‍රියව ඇතුළත් කිරීම සඳහා ආයතනික බඳවා ගැනීමේ පිළිවෙත් වෙනස් කිරීම, වඩාත් විවිධ වූ ශ්‍රම බලකායකට මඟ පෙන්වන අතර සංවිධාන තුළ නිර්මාණශීලිත්වය සහ සහයෝගීතාව ඉහළ නැංවිය හැකිය.
ඔවුන් සම්බන්ධව සමාජය තුළ පවතින තත්ත්වය සමාජයට ම බලපාන්නේ කොහොමද?
මෙරට දිස්ත්‍රික්ක 25 ම නියෝජනය වන පරිදි සිදු කළ පර්යේෂණයකට අනුව දැනට ලංකාවේ ජනගහනයෙන් 12%ක් LGBTIQ ප්‍රජාව බව හඳුනාගෙන ඇති අතර ඉන් 1% ක් සංක්‍රාන්තික සමාජභාවී ප්‍රජාව වන බව හඳුනාගෙන තිබේ. දකුණු පළාත තුළ මෙම ප්‍රජාව සඳහා සුබසාධන සහ දැනුවත් කිරීමේ කටයුතු කිරීමේදී HNRDF ආයතනය මගින් හඳුනාගනු ලැබූ ප්‍රධානතම ගැටලුව වන්නේ සමාජය තුළ මෙම ප්‍රජාවට පවතින පිළිගැනීමේ අඩුකම සහ ඔවුන් සමාජය තුළ විහිළුවට ලක්වීමය. සංක්‍රාන්තික සමාජභාවී පුද්ගලයෙකු තමන්ගේ ලිංගික අනන්‍යතාව හඳුනාගෙන එය වෙනස් කර ගැනීම ඉතා දුෂ්කර මෙන් ම දිගු කලක් ගතවන ක්‍රියාවලියකි. එබැවින් මෙම පරිවර්තනය සිදු කරගෙන තමාගේ ලිංගික අනන්‍යතාව තහවුරු කරගැනීමට අදාළ කටයුතු සකසාගන්නා තෙක් සංක්‍රාන්තික සමාජභාවී පුද්ගලයින් විහිළුවට ගැනීම සහ එම ක්‍රියාවලිය සමාජ විරෝධී දෙයක් ලෙස සලකා සමාජය කටයුතු කරන බව හඳුනාගෙන තිබේ.
මෙලෙස සිය අනන්‍යතාවට ගැළපෙන ජීවිතයක් වෙත පරිවර්තනය වීමට ඔවුන් සිය අනන්‍යතාව සම්බන්ධ සැබෑ සමාජ අත්දැකීම් ලබාතිබීම වැදගත් ය. උදාහරණ ලෙස තමා හඳුනාගත් තමාගේ අනන්‍යතාවට අදාළව පොදු සම්මතයේ පවතින විලාසිතා ඇවතුම් පැවතුම් ආදියට හුරුවීමට සමාජය සමග ගැටෙන්නට අවශ්‍ය ය. එවැනි අත්දැකීම් පවා ලබා නොමැතිව සිය අනන්‍යතාව වෙනස් කරගැනීමේ සැත්කම්වලට යොමුවීමට නොහැකි අතර ඒ සම්බන්ධව පොදු සමාජයට අවබෝධයක් ද නොමැත. සිය ලිංගික අනන්‍යතාව තහවුරු කරගැනීමට එල්ලවන මෙවැනි බාධක මෙන් ම සමාජයෙන් සිදු වන කොන්කිරීම් සහ නොසලකාහැරීම් හේතුවෙන් මෙම ආන්තික ජන කොටස් ඉතා දැඩි දුෂ්කරතාවන්ට මුහුණපාමින් සිටිති.
තමා සංක්‍රාන්තික සමාජජභාවී පුද්ගලයෙකු බවට සිය අනන්‍යතාව ඇතැම් දරුවන් කුඩා කාලයේදී හඳුනාගනු ලැබුවත් සිය අනන්‍යතාව ශාරීරිකව වෙනස් කරගැනීම සඳහා යොමු වන්නේ වයස අවුරුදු 18 ද සපිරීමෙන් අනතුරුව ය. නමුත් තමා ජීවත් වන්නේ තමාගේ සැබෑ අනන්‍යතාවට ගැලපෙන ශරීරයක් තුළ නොවන බවට තමා අවබෝධ කරගෙන එම අනන්‍යතාවට අනුව සිය ජීවිතය හැඩගසා ගැනීමට උත්සාහ කළ ද සමාජය විසින් එය හඳුනාගනු ලැබීමෙන් පසු විශේෂයෙන් පාසල තුළ ඉතා ඉහළ ලැජ්ජාවට පත්කිරීම් සහ නොසලකාහැරිම්වලට ගොදුරු වේ. පාසල් පද්ධතිය තුළ මෙවැනි දරුවන්ට ඉගැන්වීම ප්‍රතික්ෂේප කළ ගුරුවරු පිළිබඳව ද ගාල්ල දිස්ත්‍රික්කය තුළ කරුණු වාර්තා වේ.
තව ද කාන්තා පාසල්වල පිරිමි ළමයින්ගේ චරිත ලක්ෂණ පෙන්නුම් කරමින් හැසිරෙන දරුවන් හෝ පිරිමි පාසල්වල කාන්තා ලක්ෂණ සහිත දරුවන් ඇසුරු කිරීමට දෙමාපියන් හෝ වැඩිහිටියන් හෝ අවස්ථාව නොදීම සහ නොයෙකුත් නම්වලින් ලේබල් කිරීම ද සිදු වන අතර එබැවින් එවැනි දරුවන් තනිවීම් මෙන් ම ඇතැම්විට සිය කැමැත්ත පරිදි විෂයයන් තෝරාගැනීමේදී පවා විවිධ වෙනස්කම්වලට ගොදුරු වන සිදුවීම් වාර්තා වී තිබේ. මෙවැනි හේතුන් නිසා ඔවුන්ගේ අධ්‍යාපනය කඩාකප්පල් වන අතර ඉදිරි ජීවිතය ගොඩනගා ගැනීමට වෘත්තීය සුදුසුකමක් සපුරාගැනීමට හෝ යොමුවිය යුතු මගපෙන්වාදීම් ද ඔවුන් ලබන්නේ ඉතා අල්ප වශයෙනි. බොහෝවිට එවැනි මගපෙන්වීමක් ලබාදීමට කිසිවෙකු නොමැතිව ජීවිතය තුළ අතරමං වන අවස්ථා බහුල ය. සිය ජීවිතය සකසා ගැනීමට රැකියාවකට යොමුවීමේ අවශ්‍යතාව පැවතිය ද සිය අනන්‍යතාව ශාරීරිකව වෙනස් කරගෙන නොමැතිකමින් රැකියාවක් සොයාගැනීමේදී ද ගැටලු රැසකට මුහුණදීමට ඔවුන්ට සිදුවේ. රැකියාවක් ලබාගැනීමට නොහැකි වීම හේතුවෙන් කළ හැකි විකල්ප වෘත්තිමය අවස්ථාව ලෙස ඔවුන් ලිංගික ශ්‍රමිකයින් බවට පත්ව මුදල් උපයා ගැනීමට යොමු වූ අවස්ථා රැසක් වාර්තා වේ. එවැන්නකට යොමුවී සිටින වැඩිදෙනා ඉන් පෙර වෙනත් සමාජ සම්මත වෘත්තීන්ට අදාළ සම්මුඛ පරීක්ෂණ ආදියට ඔවුන් යොමු වී එම අවස්ථාවලදී ඔවුන්ගේ සුදුසුකම් අභිබවා ලිංගික අනන්‍යතාව ප්‍රශ්න කරමින් රැකියා අවස්ථා ලබානොදීමෙන් දැඩි කලකිරීමට පත්ව සිටි අයයි. එබැවින් බොහෝ විට ඔවුන් සිය ගම් පළාත් අතහැර කොළඹ ආශ්‍රිත නාගරික ප්‍රදේශ වෙත සංක්‍රමණය වී නාඳුනන පුද්ගලයන් සමග වාසය කිරීම් බහුලව දක්නට ලැබෙන්නේ වඩා පහසු ජීවිතයක් ද ගත කිරීම ය. එසේ වුව ද එවැන්නක් කළ හැකි වන්නේ ද සිය ලිංගික අනන්‍යතාව වෙනස් කරගැනීමේ ක්‍රියාවලිය සම්පූර්ණ කළ අයට වන අතර එහි අතරමැදි කාලය ගෙවමින් සිටින අයට එය ද ඉතා දුෂ්කර ය.
නිසි දැනුවත්බවින් තොර ප්‍රතිකාර භාවිතය සංක්‍රාන්ති ලිංගිකයන්ට තර්ජනයක් ??
සංක්‍රාන්තික සමාජභාවී පුද්ගලයින් සිය අනන්‍යතාව තහවුරු කරගැනීම සඳහා ශාරීරික වෙනස්කම් සිදු කරගැනීමට අදාළ හෝමෝන ප්‍රතිකාර ලබාගැනීම් සම්බන්ධව බහුලව දක්නට ලැබෙන කරුණක් වන්නේ ඔවුන්ට පෙර එවැනි ප්‍රතිකාර ලබාගත් සංක්‍රාන්තික පුද්ගලයින්ගේ දැනුවත් කිරීම් සහ උපදෙස්වලට අනුකූලව ඔවුන් එම කටයුතු සිදුකිරීමට පෙළඹීම ය. මෙය අතිශය භයානක කරුණක් වන අතර එයට හේතුව එවැනි ප්‍රතිකාර නිසි නිර්දේශයන්ගෙන් තොරව ලබාගැනීමෙන් බරපතල හානි සිදුවීම ය. අනෙක් කරුණ නම් හෝමෝන ප්‍රතිකාර මගින් ශාරීරක වෙනස්කම් අත්කර ගත්ත ද ලිංගිකත්වය වෙනස්වීමට අදාළ සිය අනන්‍යතා ලියාපදිංචි සහතිකය ලබාගත හැකි වන්නේ රජයේ රෝහලක ලියාපදිංචි වී නියමිත ක්‍රමවේදය සපුරා අදාළ ප්‍රතිකාර ලබාගත් පුද්ගලයින්ට පමණක් වීමය. මෙලෙස නිසි වෛද්‍ය නිර්දේශයකින් තොරව හෝමෝන ප්‍රතිකාර ලබාගෙන ශාරීරික මෙන් ම මානසික හානි ඇති වූ අවස්ථා ද ජීවිතවලින් වන්දි ගෙවූ සංක්‍රාන්ති ලිංගිකයන් සම්බන්ධව ද වාර්තා වී ඇති නමුත් ඒ පිළිබඳව සමාජය තුළ නිසි අවධානයක් නොමැත. මෙලෙස අධික මාත්‍රාවන්ගෙන් වෛද්‍ය නිර්දේශයන්ගෙන් තොරව ඖෂධ ලබාගැනීමට යොමුවීමේ හේතුව වන්නේ ඔවුන්ට මෙම ක්‍රියාවලිය නීත්‍යනුකූලව සහ ශාරීරිකව හෝ මානසිකව අහිතකර බලපෑම් සිදු නොවන අයුරින් සිදුකරගත හැකි ආකාරය පිළිබඳව නිසි පරිදි දැනුවත්වීමට සහ තොරතුරු ලබාගැනීමට සුදුසු තැනක් නොලැබීම ය.
Kanchana Wijayabandara