මෙවර ජාත්‍යන්තර කාන්තා දිනයේ තේමාව වූයේ ” තැනුමට තිරසර හෙටක්- සවිමත් ඇයවේ මගක්” යන්නයි. එක්සත් ජාතීන්ගේ සංවිධානය මගින් ලෝකයටම හඳුන්වා දී ඇති සහශ්‍ර සංවර්ධිත ඉලක්ක සාක්ෂාත් කර ගැනීම අරමුණු කරගෙන මෙවර කාන්තා දින තේමාව සකස් වීම ඉතා වැදගත් කරුණකි. සහශ්‍ර සංවර්ධන ඉලක්ක බොහොමයක් කාන්තාව හා සම්බන්ධ වී පැවතීම ඊට හේතුවයි. කාන්තාව සවිබල ගැන්වීම තුළින් ඇය රටේ සංවර්ධනයට කරන දායකත්වය වර්ධනය කරගැනීම යහපත් සංකල්පයකි.
ලෝකයේ සංවර්ධිත රටවල ආර්ථික කටයුතුවල දායකත්වය ලබා දී ඇති කාන්තාවන් ප්‍රමාණය 48%ක් පමණ වන අතර ශ්‍රී ලංකාවේ එය දැනට 34%ක් පමණ මට්ටමක පවතී. අප වැනි සමාජයක් තුළ කාන්තාවට ඇති අවදානම් සහගත තත්ත්වයන් සහ ඇය පිළිබඳව මුල් බැස ඇති සම්ප්‍රදායික ආකල්ප මේ ආකාරයෙන් කාන්තා ශ්‍රම දායකත්වය අවම වීමට බලපා ඇත. ප්‍රවාහනය තුළ කාන්තාවන් 90%ක් පමණ විවිධ ලිංගික හා ශාරීරික හිංසනයන්ට ලක්වීම මෙන්ම සේවා ස්ථාන තුළ හා ගෘහස්ථව ද කාන්තාවන් බොහෝ අවස්ථාවල හිංසනයට ලක්වන අවස්ථා දැකිය හැකිය. කාන්තා දිනය කාන්තාවන් පිළිබ්ඳව මෙන්ම ගැහැනු ළමුන් පිළිබඳව ද අවදානයට ලක් විය යුතු දිනයකි. 2023 වසරේ අවුරුදු 16ට අඩු ගැහැනු ළමුන් 163 දෙනෙකු නීත්‍යානුකූල නොවන ගැබ් ගැනීම්වලට ලක් වී තිබූ අතර එය 2024 වර්ෂයේදී 213ක් දක්වා ඉහළ ගොස් ඇත. 2024 තුළ ගැබ් ගත් ලාබාලතම ගැහැනු දැරියගේ වයස අවුරුදු 10කි. මේ දත්ත හරහා ශ්‍රී ලාංකික කාන්තාවන් සහ ගැහැනු ළමුන් මුහුණ දෙන හිංසනය සහ ප්‍රචණ්ඩත්වය අපට හඳුනාගත හැකිය.
මෙරට කාන්තාවන් පිරිමින් තරම් ශක්තිමත් නොවේය, කාන්තාවන් පිරිමින් තරම් වැඩකළ නොහැකිය, කාන්තාවන් හැම විටම නිවසේ දරුවන්ගේ කටයුතු පමණක් කළ යුතුය, මුළුතැන්ගෙය වැඩ කාන්තාවන්ට අතින් සිදුවිය යුතුය වැනි සාම්ප්‍රදායික අදහස් බොහෝ විට කාන්තාවන්ගේ ඉදිරිගමනට බාධාවක් වී ඇත. බොහෝ විට කාන්තාවන් රැකියා කළත් ඇය විසින් නිවසේ සියලුම රාජකාරි ද සිදු කළ යුතු අවස්ථා සමාජය තුළ අපට දැකගත හැකිය.
මෙවැනි දේ හඳුනාගෙන සුදුසු පිලියම් යෙදීම සහ අවශ්‍ය ප්‍රතිපත්ති රාමුව ශක්තිමත් කිරීම තුළින් ජාත්‍යන්තර කාන්තා දින තේමාව වඩාත් අර්ථ ගැන්විය හැකි වනු ඇත.
තුෂාර සේනානායක